O‘simliklar himoyasi va karantini

O‘simliklar himoyasi va karantini fani qishloq xo‘jaligi ekinlariga zarar yetkazuvchi zararkunandalar, o‘simlik kasalliklari va begona o‘tlarning biologik va ekologik xususiyatlari, tarqalish areali va ularga qarshi kurashishning zamonaviy, ekologik xavfsiz va samarali usullarini o‘rganadi.
Ushbu yo‘nalish bitiruvchilari – o‘simliklar himoyasi va karantini sohasida chuqur nazariy bilim va amaliy ko‘nikmaga ega bo‘lgan mutaxassislardir. Ular fitosanitar nazorat idoralari, o‘simliklar karantini xizmatlari, ilmiy-tadqiqot muassasalari, laboratoriyalar, agrofirma va fermer xo‘jaliklari hamda eksport-import mahsulotlarini nazorat qiluvchi tashkilotlarda faoliyat yuritishlari mumkin.
Ta’lim jarayoni fitopatologiya, entomologiya, o‘simliklar karantini, himoya vositalari texnologiyasi, integratsiyalashgan zararkunanda nazorati, agroekologiya va diagnostika fanlari asosida olib boriladi. Amaliyotlar karantin laboratoriyalari, dala-tajriba stansiyalari, fitosanitar xizmatlar va ilmiy-tadqiqot institutlarida o‘tkaziladi.
Bitiruvchilarni tayyorlovchi asosiy kafedra O‘simliklarni himoyasi va karantini kafedrasidir.