Erta bahor davrida tuproq harorati ko‘tarilishi bilan bir qatorda ko‘plab begona o‘tlar ham tez unib chiqadi. Begona o‘tlar qishloq xo‘jaligi ekinlari bilan birga o‘sib, tuproqdagi oziqa moddalari, namlik va yorug‘lik uchun raqobatlashadi. Natijada ekinlarning o‘sishi sustlashadi va hosildorlik kamayadi. Shu sababli erta bahorda begona o‘tlar bilan o‘z vaqtida va samarali kurashish muhim agrotexnik tadbirlardan hisoblanadi. Erta bahorda unib chiqadigan begona o‘tlarga sho‘ra, ituzum, yantoq, qizilmiya, g‘umay, semizo‘t kabi o‘simliklar kiradi. Bu begona o‘tlar tez rivojlanib, ekin maydonlarini qisqa vaqt ichida egallab olishi mumkin.
Begona o‘tlar bilan kurashishda birinchi navbatda agrotexnik usullardan foydalanish tavsiya etiladi. Buning uchun kuzgi shudgor sifatli o‘tkazilishi, dalada qolgan o‘simlik qoldiqlari tozalanishi va bahor boshida yer yumshatilib borilishi kerak. Tuproqni erta bahorda kultivatsiya qilish begona o‘t urug‘larining unib chiqishini kamaytiradi. Ikkinchi muhim usul — mexanik kurash choralaridir. Ekin qator oralari muntazam ravishda kultivatsiya qilinishi, chopiq ishlari olib borilishi begona o‘tlarning rivojlanishini cheklaydi.
Ayniqsa, yosh begona o‘tlarni ildizi bilan yo‘qotish samarali hisoblanadi. Kimyoviy kurash usuli ham keng qo‘llaniladi. Bunda gerbitsid preparatlaridan foydalanish orqali begona o‘tlarni yo‘qotish mumkin. Gerbitsidlarni qo‘llashda ularning me’yoriga, qo‘llash muddatiga va ekin turiga mosligiga qat’iy rioya qilish lozim.
Ijtimoiy tarmoqlar:
Shuningdek o'qing
