Ayolga ehtirom – jamiyatga ehtirom

Toshkent davlat agrar universitetida 8-mart — Xalqaro xotin-qizlar kuni munosabati bilan ko‘tarinki ruhdagi bayram konsert dasturi bo‘lib o‘tdi. "Xotin-qizlar tadbirkor, olim, muallim, shifokor, muhandis, davlat va jamoat arbobi, bir so‘z bilan aytganda, xonadonlarimiz farishtasi, oila va jamiyat tayanchi, desak, ayni haqiqatni aytgan bo‘lamiz”. — Shavkat Mirziyoyev
Tadbir avvalida universitet rektori N. Oblomuradov kirish so‘zi bilan barcha ayollarni samimiy tabriklab, ularga ezgu tilaklarini bildirdi: “Sizlarga dunyodagi eng bebaho boylik – oilaviy baxt-saodat, tinchlik-xotirjamlik, farzandlar va nabiralar kamolini ko‘rib yurish quvonchi hamisha yor bo‘lishini tilayman. Qalbingiz doim bugungi bahordek yashnab tursin, bayram kayfiyati sizlarga yor bo‘lsin”. Bayram munosabati bilan universitetning bir qator professor-o‘qituvchilari, tyutorlari, tarbiyachi pedagoglari hamda universitet hududi obodonligi yo‘lida mehnat qilayotgan fidoiy ayollar munosib taqdirlandi. Tadbir davomida “Muqaddas ayol” qo‘shig‘i, T. Jabborov ijrosidagi kuy-qo‘shiqlar, tyutorlar tomonidan “Ayol” she’ri yangradi. “Bo‘ston” ashula va raqs ansambli raqqosalari tomonidan ijro etilgan “Mustahzod” raqsi esa barchaga ko‘tarinki kayfiyat bag‘ishladi. Shuningdek, mehmon san’atkor, “Shuhrat” medali sohibasi R. Ro‘zimova xorazmcha qo‘shiqlari bilan davraga fayz bag‘ishladi. S. Nurmuhammedov tomonidan “Ona” qo‘shig‘i, N. Himmatov va Y. Janibekova ijrosidagi “Buxorocha” qo‘shig‘i hamda I. Isoqov tomonidan namoyish etilgan “Ayol” monologi tomoshabinlar tomonidan iliq kutib olindi.