Toshkent davlat agrar universiteti olimlari tomonidan qishloq xo‘jaligida suv resurslaridan oqilona foydalanish va oziq-ovqat xavfsizligini ta’minlash borasida keng ko‘lamli ilmiy izlanishlar olib borilmoqda. Xususan, Agronomiya va agrotexnologiyalar kafedrasi professori J.Eshonqulov rahbarligidagi loyiha jamoasi Jizzax va Farg‘ona viloyatlarida bo‘lib, kuzgi bug‘doyni suv tejamkor texnologiyalar asosida sug‘orish va oziqlantirish bo‘yicha dala tajribalarini o‘rgandilar. O‘rganishlar davomida Jizzax viloyati Paxtakor tumanidagi ilmiy tajriba stansiyasi hamda Farg‘onadagi “Imomali Qosimovich” fermer xo‘jaligi dalalarida bug‘doyning rivojlanish holati tahlil qilinib, suv tejamkor sug‘orish me’yorlari, o‘g‘itlash tizimi va o‘simlikning biometrik ko‘rsatkichlari bo‘yicha fenologik kuzatuvlar olib borildi.
Respublikamizda 2028-yilga qadar sug‘oriladigan yerlarning 80 foizida suv tejovchi texnologiyalarni joriy etish rejalashtirilgan. Mazkur ilmiy loyiha natijasida sug‘orish jarayonlarini avtomatlashtirish, suv ta’minoti og‘ir hududlarda resurslarni kafolatli yetkazish va eng muhimi — bug‘doy hosildorligini gektariga 100 sentnerga yetkazish ko‘zda tutilgan.
Ijtimoiy tarmoqlar:
