Mamlakatimiz qishloq xo‘jaligida eng muhim mavsumlardan biri paxta terimi qizg‘in pallaga kirar ekan, Buxoro viloyatida o‘tkazilgan yirik ilmiy-amaliy seminar paxtachilikda innovatsion yondashuvlarni keng joriy etish yo‘lida muhim ahamiyat kasb etdi. Mazkur seminarda Toshkent davlat agrar universiteti rektori N.Oblomuradov boshchiligida tajribali professor-o‘qituvchilarimiz tomonidan mexanizator-operatorlar, yosh mutaxassislar, fermerlar, klaster vakillari hamda tuman hokimlari o‘rinbosarlariga ilmiy bilim va ko’nikmalar berildi. Nazariya va amaliyot uyg‘unlashligida tashkil etilgan ushbu seminarda ikki kun davomida nazariy mashg‘ulotlarda 100 nafarga yaqin mexanizator-operator va hokimlik vakillari ishtirok etdi. Uchinchi kuni esa dala sharoitida 300 nafarga yaqin fermer, mexanizator va mutaxassislar uchun amaliy mashg‘ulotlar o‘tkazildi. Amaliyot davomida xorijiy ishlab chiqaruvchilarning turli rusumdagi paxta terish mashinalari namoyish etildi. Professor-o‘qituvchilarimiz ularning ishlash prinsiplari, samarali boshqarish, sozlash va texnik xizmat ko‘rsatish sirlarini ishtirokchilarga batafsil tushuntirib berdi. Seminar yakunida esa vakillarimiz tomonidan maxsus metodik qo‘llanmalar ishlab chiqilib, Buxoro viloyatining barcha tumanlariga tarqatildi. Mazkur materiallar mexanizatorlar va fermerlar uchun amaliy yordamchi manba bo‘lib xizmat qilishi kutilmoqda.
Ushbu seminarni tashkil etishdan asosiy maqsad, paxta maydonlarini sifatli terimga tayyorlash, zamonaviy texnika imkoniyatlaridan to‘liq foydalanish va eng muhimi, mexanizatorlar hamda operatorlarning malakasini oshirishdir.
Ijtimoiy tarmoqlar:
