Toshkent davlat agrar universitetida qishloq xo‘jaligining dolzarb masalalariga bag‘ishlangan “Qishloq xo‘jaligi ishlab chiqarishida aqlli boshqaruv va raqamli yechimlar” mavzusidagi respublika ilmiy-amaliy anjumani yuqori saviyada o‘tkazildi. Tadbirda davlat va jamoat ilm-fan arboblari, xalqaro ekspertlar hamda IT-sohasi namoyandalari ishtirok etib, agrar tarmoqni raqamli transformatsiya qilish bo‘yicha o‘zaro tajriba almashdilar. Anjumanni universitet rektori, professor Narzullo Oblamuradov hamda Qishloq xo‘jaligi vaziri o‘rinbosari Alisher Shukurov ochib berdi. Muloqot davomida mamlakatimizda “aqlli qishloq xo‘jaligi” konsepsiyasiga o‘tish davlat siyosatining ustuvor yo‘nalishiga aylangani alohida ta’kidlandi.
Ma’lumot uchun: O‘zbekiston Respublikasi Prezidentining 2025-yil 22-oktabrdagi PF-189-sonli Farmoni sohada sun’iy intellekt texnologiyalarini rivojlantirish uchun muhim huquqiy asos bo‘lib xizmat qilmoqda.
Anjuman doirasida ishtirokchilar quyidagi yo‘nalishlarda o‘zaro tajriba almashdilar: Aqlli dehqonchilik: Agrotexnik jarayonlarni masofadan boshqarish. Resurs tejamkorlik: Suv, yer va energiya resurslarini optimallashtirish. Monitoring: Ekinlar holatini raqamli tizimlar orqali nazorat qilish.
TDAU bugungi kunda agrar soha uchun "raqamli agronomlar" tayyorlash markaziga aylanmoqda: 300 dan ortiq talaba Axborot tizimlari va texnologiyalari yo‘nalishida tahsil olmoqda.
Yangi yo‘nalish: Kelgusi o‘quv yilidan “Sun’iy intellekt” ta’lim yo‘nalishiga qabul boshlanadi. Ilmiy baza: Yaqin kunlarda universitet qoshida “Zamonaviy qishloq xo‘jaligi sun’iy intellekt laboratoriyasi” o‘z faoliyatini boshlaydi. Tadbir yakunida sohani raqamlashtirishga munosib hissa qo‘shayotgan faol ishtirokchilar va innovatsion g‘oya mualliflari tashakkurnoma hamda esdalik sovg‘alari bilan taqdirlandilar.
Ijtimoiy tarmoqlar:
