Dastlab, mehmonlar “Renessans” ma’ruza zali bilan tanishib, samimiy fikr almashishdi. Shuningdek, O‘rmon xo‘jaligi va landshaft dizayn fakultetida faoliyat yuritayotgan “Manzarali ko‘chat yetishtirish” laboratoriyasi ish jarayoni bilan tanishildi. Bu yerda ko‘chat yetishtirishning zamonaviy texnologiyalari va landshaft dizayniga oid ilg‘or tajribalar haqida atroflicha ma’lumot berildi hamda o‘zaro fikr almashildi. Tadbir davomida mehmonlar Qishloq xo‘jaligi mahsulotlarini saqlash va qayta ishlash fakultetidagi quritish laboratoriyasi faoliyati bilan ham yaqindan tanishishdi. Shuningdek, O‘simliklar himoyasi, agrokimyo va tuproqshunoslik fakultetida zamonaviy talablar asosida tashkil etilgan, turli tuproq namunalari bilan boyitilgan ko‘rgazmali burchak mehmonlarda katta qiziqish uyg‘otdi. Ko‘rgazmada cho‘l, tog‘ oldi va tog‘ mintaqalarga xos jami 22 xil tuproq namunalari namoyish etilib, ularning xilma-xilligi, xususiyatlari va ilmiy-amaliy ahamiyati batafsil yoritildi.
Bundan tashqari, Janubiy Koreya Respublikasining Chungnam milliy universiteti bilan hamkorlikda amalga oshirilayotgan “O‘zbekistonda qishloq xo‘jaligi muhitini yaxshilash va professional kadrlar tayyorlash” loyihasi doirasidagi zamonaviy ilmiy laboratoriya faoliyati bilan ham tanishildi. Bu uchrashuv doirasida ilmiy tajriba almashish va amaliy hamkorlikni rivojlantirish bo‘yicha qiziqarli fikrlar bildirildi, bu esa Toshkent davlat agrar universitetida olib borilayotgan ilmiy ishlarning xalqaro miqyosda ham dolzarbligini yana bir bor tasdiqladi.
Ijtimoiy tarmoqlar:
