Mutaxassislarning ma’lumotiga ko‘ra, gilosni ekish uchun eng qulay mavsum kuz bo‘lib, ayniqsa oktabr–noyabr oylari ko‘chatlarning qish davomida bemalol ildiz otishi va bahorda tez unib chiqishiga imkon yaratadi. Bahorda — mart va aprel oylarida ham ekish mumkin, biroq havo harorati sovuq bo‘lmasligi kerak.
Gilos ko‘chatlari bozorda ikki ko‘rinishda sotiladi. Tuvakli ko‘chatlar issiqxonada yetishtiriladi va ildiz tizimi shu idish ichida shakllanadi. Bu usul ko‘chatning ildizlari shikastlanishining oldini olib, uni yil davomida ekish imkonini beradi. Yalang‘och ildizli ko‘chatlar esa faqat kuz va bahor mavsumlarida sotiladi va maydon sharoitida o‘stirilgani bois iqlim tebranishlariga bardoshli bo‘ladi. Mutaxassislar gilos bog‘larida meva hosilini ko‘paytirish maqsadida changlanish masalasiga alohida e’tibor qaratishni tavsiya qiladi. Sababi ayrim navlar o‘z-o‘zidan changlana olmaydi. Shu bois ekish hududida qo‘shimcha gilos daraxti bo‘lishi meva hosilini sezilarli oshiradi.
Ekish bo‘yicha amaliy tavsiyalar:
— ko‘chatlar quyoshli va shamoldan himoyalangan joyga ekiladi;
— tuproq juda og‘ir yoki haddan tashqari nam bo‘lmasligi kerak;
— ekish chuquri ildiz to‘pidan ikki baravar keng va uchdan bir qism chuqurroq bo‘lishi zarur;
— kompost va o‘g‘it aralashmasi ildiz otishni tezlashtiradi;
— ekilgach tayanch tayoqchalar yordamida ko‘chat tik holatda ushlab turiladi;
— dastlabki yillarda, ayniqsa yozda muntazam sug‘orish talab qilinadi. Mutaxassislar gilos tarkibidagi tabiiy vitamin va antioksidantlar inson salomatligi uchun muhim ekanini qayd etib, undan olingan mahsulotlar immunitetni mustahkamlashi, yurak faoliyatini qo‘llab-quvvatlashi va ko‘rish qobiliyatiga ijobiy ta’sir ko‘rsatishini ta’kidlamoqda.
Ijtimoiy tarmoqlar:
