Bahor fasli bir yillik sabzavot va gul ko‘chatlarini ekish uchun eng qulay davr hisoblanadi. Yuqori va sifatli hosil olish uchun avvalo yer maydoni to‘g‘ri tanlanishi lozim. Maydon quyosh nuri yaxshi tushadigan, shamoldan himoyalangan va unumdor tuproqqa ega bo‘lishi kerak. Tuproq yumshoq hamda suv o‘tkazuvchan bo‘lsa, ko‘chatlar tez ildiz otadi va sog‘lom rivojlanadi. Ekishdan oldin yer 25–30 sm chuqurlikda kovlanib, har bir kvadrat metrga 4–6 kg chirigan go‘ng yoki kompost solish tavsiya etiladi. Mineral o‘g‘itlardan me’yorida foydalanish hosildorlikni oshiradi. Bahorda odatda pomidor, bodring, qalampir, baqlajon, qovoq, tarvuz va qovun kabi sabzavotlar, shuningdek turli manzarali gullar ekiladi. Bu o‘simliklar iliqsevar bo‘lgani sababli tuproq harorati kamida +10–12°C ga yetgach ekish boshlanadi. Ko‘chatlar sovuq xavfi to‘liq o‘tgandan so‘ng ochiq maydonga ko‘chiriladi. Ekish jarayonida o‘simliklar orasidagi masofani saqlash muhim. Bu ularning oziqlanishi, shamollanishi va kasalliklarga chidamliligini oshiradi. Ko‘chat ekilgandan keyin darhol sug‘oriladi, ildiz otguncha muntazam namlik ta’minlanadi. Vegetatsiya davrida tuproqni yumshatish, begona o‘tlarni yo‘qotish va qo‘shimcha oziqlantirish ishlari olib boriladi. Zararkunanda va kasalliklarga qarshi o‘z vaqtida choralar ko‘rish esa mo‘l hosil olishning garovidir.
Ijtimoiy tarmoqlar:
Shuningdek o'qing
