Joriy yilning 24-fevral kuni Shavkat Mirziyoyevning yoshlar bilan o‘tkazgan ochiq muloqotida belgilab berilgan ustuvor vazifalar ijrosini ta’minlash maqsadida Toshkent davlat agrar universitetida bitiruvchi yoshlar bandligini ta’minlashga qaratilgan keng qamrovli ishlar tashkil etilmoqda

Jumladan, mazkur tashabbus doirasida Toshkent viloyati hokimi o‘rinbosari Otabek Sultonbekov boshchiligida viloyatning 22 ta tuman va shahar hokimlari o‘rinbosarlari ishtirokida bitiruvchilar bilan ochiq muloqotlar o‘tkazildi. Ushbu uchrashuvlardan ko’zlangan maqsad yoshlarning bandligini ta’minlash, ularni o‘z mutaxassisligi bo‘yicha ish bilan qamrab olish hamda hududlardagi mavjud bo‘sh ish o‘rinlari bilan yaqindan tanishtirishdan iborat. Har bir fakultet kesimida tashkil etilgan muloqotlarda korxona va tashkilot rahbarlari ishtirok etib, bitiruvchi talabalar bilan to‘g‘ridan-to‘g‘ri suhbat olib bordilar. Yoshlar o‘zlarini qiziqtirgan savollarga javob oldi, mehnat bozoridagi talab va takliflar, ishga joylashish shartlari hamda kelgusidagi hamkorlik imkoniyatlari muhokama qilindi. Ayniqsa, agrar sohaga ixtisoslashgan kadrlarga bo‘lgan ehtiyoj, zamonaviy qishloq xo‘jaligi korxonalarida yosh mutaxassislar uchun yaratilayotgan shart-sharoitlar, tadbirkorlikni qo‘llab-quvvatlash mexanizmlari atroflicha tushuntirildi.