Toshkent davlat agrar universiteti hamda Energetika vazirligi huzuridagi “Qayta tiklanuvchi energiya manbalari” milliy ilmiy-tadqiqot instituti o‘rtasida ilmiy, o‘quv, texnik va amaliy hamkorlik bo‘yicha muhim kelishuv imzolandi. Mazkur hamkorlik doirasida Agromuhandislik va texnologiyalar fakulteti professor-o‘qituvchilari, doktorant va magistrantlari o‘z ilmiy tadqiqotlarini bevosita ishlab chiqarish bilan uzviy bog‘lagan holda olib borish imkoniyatiga ega bo‘ladilar. Shuningdek, talabalar uchun sohaga oid eng zamonaviy texnologiyalar muhitida samarali va tizimli amaliyot jarayonlari yo‘lga qo‘yiladi.
Kelishuvning eng muhim jihatlaridan biri — dual ta’lim tizimini rivojlantirishdir. Bu orqali talabalar nazariy bilimlarini real amaliy jarayonlar bilan uyg‘unlashtirib, ishlab chiqarish muhitida bevosita tajriba orttiradilar va kelajakda "yashil energiya" sohasida raqobatbardosh, yuqori malakali mutaxassis bo‘lib shakllanadilar. Ushbu hamkorlik universitetiimizda ta’lim sifatini yangi bosqichga olib chiqish, amaliyotga yo‘naltirilgan o‘qitish modelini kengaytirish hamda zamonaviy, professional kadrlar tayyorlash borasidagi navbatdagi muhim qadamdir.
Ijtimoiy tarmoqlar:
