Bugun Toshkent davlat agrar universitetining Axborot-resurs markazi hududi ma’rifat va madaniyat bayramiga mezbonlik qildi. Universitetda kitobxonlik madaniyatini yuksaltirish va yoshlar orasida mutolaani keng targ‘ib etish maqsadida tashkil etilgan “Xalqaro kitob festivali” bo'lib o'tdi. Tadbirda universitet rektori Narzullo Oblomuradov, tajribali professor-o‘qituvchilar hamda kitobsevar talaba-yoshlar faol ishtirok etishdi. Festival davomida mahalliy va xorijiy nashriyotlar, turli davlatlardan tashrif buyurgan yozuvchi-shoirlar hamda san’at ahli o‘rtasida o‘ziga xos madaniy ko‘prik o‘rnatildi. Ishtirokchilar mashhur mualliflar bilan yuzma-yuz muloqot qilish, yangi asarlar taqdimotida qatnashish va mahorat darslari orqali o‘z bilimlarini boyitish imkoniga ega bo‘ldilar.
Shuningdek, tashkil etilgan keng ko‘lamli ko‘rgazma-yarmarkalarda jahon va o‘zbek adabiyotining durdona asarlari, zamonaviy va klassik nashrlar namoyish etilib, barcha kitobxonlar uchun imtiyozli narxlarda xarid qilish imkoniyati yaratildi.
Universitet rektori o‘z nutqida ta’kidlaganidek, xalqaro miqyosdagi anjumanlar talabalarning intellektual salohiyatini oshirish va ularni ilm-fanga bo‘lgan qiziqishlarini yanada rag‘batlantirishda g‘oyat muhim ahamiyat kasb etadi. Mazkur festival nafaqat kitob savdosi, balki chinakam ma’naviy almashinuv maskani sifatida barcha ishtirokchilarda unutilmas taassurot qoldirdi.
Ijtimoiy tarmoqlar:
